അറിയുവാനാവാതെ...

തിരക്കായിരുന്നു നിനക്കേറെയെപ്പൊഴും
തിരക്കി ഞാനന്തിക്കണയുന്ന നേരത്തും
പുകക്കണ്ണെരിച്ചു നിനക്കായി കുമ്പിളില്‍
കുടമല്ലികത്താരെടുത്തു വന്നപ്പൊഴും
'തിരക്കില്‍ തളച്ചും തിരയടിച്ചാറ്റിയും
തീര്‍ക്കട്ടെയെന്നെ നീയൊറ്റയ്ക്കു മാറ്റുക'

'അറിയുവാനാവില്ലയെന്നെ നിനക്കെന്നു'
പറയുകയാണു നീര്‍ വീങ്ങിയ കണ്‍തടം
പൊടിതൂത്തുഷസിലും കറിയുണങ്ങിക്കലം
ഒരുകൈയുരച്ചഴല്‍ മോറുമൊരുച്ചയ്ക്കും
കനവുകള്‍ ക്ളാവേന്തി നില്‍ക്കും നിലവിള-
ക്കൊരുപിടിച്ചാരം പുരട്ടി തിളക്കി നീ
പരിദേവനത്തിന്‍റെ തീപ്പെട്ടിക്കൊലുര-
ച്ചെഴുതിരികള്‍ നീട്ടുന്ന സായന്തനത്തിലും
അറിയാത്ത ഭാഷ നിന്നടര്‍മിഴിത്തുമ്പിലായ്‌
വിരിയുന്ന കണ്ടകം ചിക്കിയിരിപ്പു ഞാന്‍

'പറയുക ഞാനെന്തു വേണമീ നെഞ്ചിലായ്‌
പകലിന്‍ പടര്‍പ്പു വിടര്‍ത്തിയെടുക്കുവാന്‍'

വഴിക്കണ്ണു മറ്റാര്‍ക്കുമേകാതെ വരികിലും
വഴിയോരവാക്കുകളെല്ലാം പകര്‍ന്നിലും
നെടുവീര്‍പ്പിലുടയുന്ന തീഗോളമിന്നു നീ
ഇടനെഞ്ചിലേക്കിട്ടു ചൊല്ലുന്നു പിന്നെയും
'അറിയുവാനാവില്ലയെന്നെ നിനക്കൊട്ടും'
അറിവിന്നുമപ്പുറത്താണെണ്റ്റെ താമസം'