മുറ്റത്തു ബോംബു മുളച്ചുപൊന്തുന്നതും മറ്റൊരു പെണ്ണിന്‍ മടിക്കുത്തഴിഞ്ഞതും

മുറ്റത്തു ബോംബു മുളച്ചുപൊന്തുന്നതും
മറ്റൊരു പെണ്ണിന്‍ മടിക്കുത്തഴിഞ്ഞതും
മാത്രമേ കാണൂ നിന്‍ ചുണ്ടിലെന്നോര്‍ത്തിപ്പോള്‍
നാട്ടുവിശേഷം തിരക്കുകയില്ല ഞാന്‍

വാരിക്കുഴിയില്‍ തളര്‍ന്നു പിടഞ്ഞതും
വാടിക്കറുത്തുമെലിഞ്ഞുപൊഴിഞ്ഞതും
മാത്രമേകാണു നിന്‍ ചുണ്ടിലെന്നോര്‍ത്തിപ്പോള്‍
ആറ്റു വിശേഷം തിരക്കുകയില്ല ഞാന്‍

ചുറ്റുമതിലിനകത്തു ചുരുണ്ടതും
മറ്റൊരാള്‍ക്കായ്‌ പടിവാതിലടഞ്ഞതും
മാത്രമേ കാണൂ നിന്‍ ചുണ്ടിലെന്നോര്‍ത്തിപ്പോള്‍
വീട്ടുവിശേഷം തിരക്കുകയില്ല ഞാന്‍

കണ്ണില്‍ കനല്‍പൊടികൊണ്ടുവരുന്നതും
കോരി നിണമണം വാരി വരുന്നതും
മാത്രമേ കാണൂ നിന്‍ ചുണ്ടിലെന്നോര്‍ത്തിപ്പോള്‍
കാറ്റു വിശേഷം തിരക്കുകയില്ല ഞാന്‍

പാടെ വരണ്ടു തകര്‍ന്നു കിടന്നതും
പാഴായ നാഥന്‍ തുലഞ്ഞു മറഞ്ഞതും
മാത്രമേ കാണൂ നിന്‍ ചുണ്ടിലെന്നോര്‍ത്തിപ്പോള്‍
പാടവിശേഷം തിരക്കുകയില്ല ഞാന്‍